04.08.2026 - ನನ್ನ ಪರಮಪಿತನು ನೆಡದ ಗಿಡಗಳನ್ನೆಲ್ಲಾ ಬೇರುಸಹಿತ ಕಿತ್ತುಹಾಕಲಾಗುವುದು. ಅವರನ್ನು ಅವರಷ್ಟಕ್ಕೇ ಬಿಡಿ

 ಮೊದಲನೇ ವಾಚನ: ಪ್ರವಾದಿ ಯೆರೆಮೀಯನ ಗ್ರಂಥ  30:1-2, 12-15, 18-22

ಸರ್ವೇಶ್ವರ ಸ್ವಾಮಿ ಯೆರೆಮೀಯನಿಗೆ ಮತ್ತೊಮ್ಮೆ ಈ ಸಂದೇಶವನ್ನು ದಯಪಾಲಿಸಿದರು: “ಇಸ್ರಯೇಲರ ದೇವರಾದ ಸರ್ವೇಶ್ವರ ಹೀಗೆನ್ನುತ್ತಾರೆ - ‘ನಾನು ನಿನಗೆ ಹೇಳಿರುವ ಮಾತುಗಳನ್ನೆಲ್ಲ ಗ್ರಂಥರೂಪವಾಗಿ ಬರೆ. ಹೌದು, ಸರ್ವೇಶ್ವರ ಹೀಗೆನ್ನುತ್ತಾರೆ: “ನಿನ್ನ ಗಾಯಗಳು ಗುಣಹೊಂದವು ನಿನ್ನ ಹುಣ್ಣನ್ನು ವಾಸಿಮಾಡಲಾಗದು. ನಿನ್ನ ಪರ ವಾದಿಸುವವರಿಲ್ಲ, ನಿನ್ನ ವ್ರಣಕ್ಕೆ ಔಷಧವಿಲ್ಲ ನಿನ್ನನ್ನು ಆರೈಕೆ ಮಾಡುವವರಿಲ್ಲ. ನಿನ್ನ ನಲ್ಲರೆಲ್ಲರು ಮರೆತುಬಿಟ್ಟರು, ನಿನ್ನನ್ನು ಹುಡುಕದಿರುವರು ಶತ್ರುವಿನಂತೆ ನಿನ್ನನ್ನು ಥಳಿಸಿದೆನು, ಕ್ರೂರವಾಗಿ ದಂಡಿಸಿದೆನು. ಏಕೆಂದರೆ, ನಿನ್ನ ಅಪರಾಧ ಹೆಚ್ಚಿದೆ ನಿನ್ನ ಪಾಪಗಳು ಲೆಕ್ಕವಿಲ್ಲದಿವೆ. ‘ಅಯ್ಯೋ ನೋವು ನಿಲ್ಲದಿದೆ,’ ಎಂದು ನಿನ್ನ ಗಾಯಕ್ಕಾಗಿ ಗೋಳಿಡುತ್ತಿರುವೆ ಏಕೆ? ನಿನ್ನ ಅಪರಾಧ ಹೆಚ್ಚಿದೆ, ಪಾಪಗಳು ಬಹಳವಿವೆ ಎಂದೇ ಇದನ್ನೆಲ್ಲ ನಿನಗೆ ಮಾಡಿದೆ. ಯಕೋಬನ ಮನೆಗಳ ದುರವಸ್ಥೆಯನ್ನು ತಪ್ಪಿಸುವೆನು ಜೆರುಸಲೇಮಿನ ನಿವಾಸಗಳನ್ನು ನಿಶ್ಚಯವಾಗಿ ಕರುಣಿಸುವೆನು. ಅದರ ಹಾಳುದಿಬ್ಬಗಳ ಮೇಲೆ ಹೊಸನಗರ ಕಟ್ಟುವೆನು ಅದರ ಅರಮನೆ ಮೊದಲಿದ್ದ ಸ್ಥಳದಲ್ಲೆ ನೆಲೆಯಾಗಿ ನಿಲ್ಲುವುದು. ಅವುಗಳಿಂದ ಸ್ತುತಿಸ್ತೋತ್ರ ಕೇಳಿಬರುವುದು ಅಲ್ಲಿಂದ ನಲಿವುನಾದ ಕೇಳಿಸುವುದು. ಆ ಜನರನ್ನು ಹೆಚ್ಚಿಸುವೆನು, ಅವರು ಕೊಂಚವಾಗಿರರು. ಅವರನ್ನು ಘನಪಡಿಸುವೆನು, ಅವರು ಹೀನರಾಗಿರರು. ಅವನ ಸಂತಾನ ಹಿಂದಿನ ಸುಸ್ಥಿತಿಯನ್ನು ಹೊಂದುವುದು ಅವರ ಸಮಾಜ ನನ್ನ ಮುಂದೆ ನೆಲೆಯಾಗಿ ನಿಲ್ಲುವುದು ಅವರನ್ನು ಬಾಧಿಸುವವರನ್ನೆಲ್ಲ ನಾನು ದಂಡಿಸುವೆನು. ಅವರಲ್ಲೇ ಒಬ್ಬನು ಅವರಿಗೆ ಪ್ರಭುವಾಗುವನು ಅವರ ವಂಶದವನೇ ಅವರನ್ನು ಆಳುವನು. ಅವನನ್ನು ನಾನು ನನ್ನ ಹತ್ತಿರ ಬರಗೊಡಿಸುವೆನು ಅವನು ನನ್ನ ಸನ್ನಿಧಾನಕ್ಕೆ ಸೇರುವನು. ಇಲ್ಲದಿದ್ದಲ್ಲಿ, ನನ್ನನು ಸಮೀಪಿಸಲು ಧೈರ್ಯಗೊಳ್ಳುವವನಾರು? - ಇದು ಸರ್ವೇಶ್ವರನಾದ ನನ್ನ ನುಡಿ. ನೀವು ನನಗೆ ಪ್ರಜೆಯಾಗಿರುವಿರಿ ನಾನು ನಿಮಗೆ ದೇವರಾಗಿರುವೆನು.

ಕೀರ್ತನೆ: 102:16-18, 19-21, 29, 22-23

ಶ್ಲೋಕ: ಪ್ರಭು ಪುನರುದ್ದರಿಸುವನು ಸಿಯೋನನು

ಹೆದರುವುವು ಪ್ರಭುವೆಂಬ ನಿನ್ನ ನಾಮಕೆ ಜನಾಂಗಗಳು|

ಭಯಪಡುವರು ನಿನ್ನ ಪ್ರತಾಪಕೆ ಭೂ ರಾಜರುಗಳು||

ಏಕೆನೆ ಪುನರುದ್ಧರಿಸುವನು ಸಿಯೋನನು|

ಪ್ರತ್ಯಕ್ಷಮಾಡುವನಾತ ತನ್ನ ಮಹಿಮೆಯನು||

ತಿರಸ್ಕರಿಸನಾತ ನಿರ್ಗತಿಕರ ಮೊರೆಯನು|

ನೆರವೇರಿಸದೆ ಬಿಡನು ಅವರ ಕೋರಿಕೆಯನು||

ಮುಂದಣ ಸಂತತಿಗಿದು ಶಾಸನವಾಗಿರಲಿ|

ಮುಂದೆ ಹುಟ್ಟುವ ಪ್ರಜೆ ಪ್ರಭುವನು ಹೊಗಳಲಿ||

ಭೂಲೋಕವನು ವೀಕ್ಷಿಸಿದನು ಪ್ರಭು ಪರಲೋಕದಿಂದ|

ದೃಷ್ಟಿಸಿದನು ತನ್ನ ಉನ್ನತ ಪವಿತ್ರ ಸ್ಥಾನದಿಂದ||

ಆಲಿಸಿದನಾತನು ಬಂಧಿತರ ಗೋಳಾಟವನು|

ಬಿಡಿಸಿಹನು ಮರಣತೀರ್ಪಿಗೆ ಗುರಿಯಾದವರನು||

ಹೀಗೆ ಪಭುವಿಗಾರಾಧನೆ  ಸಲ್ಲಿಸಲು|

ಜನಾಂಗಗಳೂ ರಾಜ್ಯಗಳೂ ಕೂಡಿರಲು||

ಹೊಗಳಲಾಗುವುದು ಪ್ರಭುವಿನ  ನಾಮ  ಸಿಯೋನಿನಲಿ|

ಆತನ ಗುಣಗಾನವಿರುವುದು ಆ  ಜೆರುಸಲೇಮಿನಲಿ||

ಘೋಷಣೆ                   ಕೀರ್ತನೆ 25:4

ಅಲ್ಲೆಲೂಯ, ಅಲ್ಲೆಲೂಯ!

ನಿನ್ನ  ಮಾರ್ಗವನು  ಪ್ರಭೂ,  ನನಗೆ  ತೋರಿಸು,

ನೀನೊಪ್ಪುವ  ಪಥದಲ್ಲಿ  ನಾ  ನಡೆಯ  ಕಲಿಸು,,

ಅಲ್ಲೆಲೂಯ!

ಶುಭಸಂದೇಶ: ಮತ್ತಾಯ 15:1-2, 10-14

ಜೆರುಸಲೇಮಿನಿಂದ ಫರಿಸಾಯರೂ ಧರ್ಮಶಾಸ್ತ್ರಿಗಳೂ ಯೇಸುಸ್ವಾಮಿಯ ಬಳಿಗೆ ಬಂದು, "ನಿನ್ನ ಶಿಷ್ಯರು ಪೂರ್ವಜರಿಂದ ಬಂದ ಸಂಪ್ರದಾಯಗಳನ್ನು ಮೀರುವುದೇಕೆ? ಅವರು ಊಟಕ್ಕೆ ಮುಂಚೆ ಶುದ್ಧಾಚಾರಕ್ಕೆ ಅನುಗುಣವಾಗಿ ಕೈತೊಳೆದುಕೊಳ್ಳದೆ ಊಟ ಮಾಡುವುದೇಕೆ?" ಎಂದು ಕೇಳಿದರು. ಅನಂತರ ಯೇಸುಸ್ವಾಮಿ ಜನರನ್ನು ತಮ್ಮ ಬಳಿಗೆ ಕರೆದು, "ನಾನು ಹೇಳುವುದನ್ನು ಕೇಳಿ ಚೆನ್ನಾಗಿ ತಿಳಿದುಕೊಳ್ಳಿರಿ: ಬಾಯೊಳಕ್ಕೆ ಹೋಗುವಂಥದ್ದು ಮನುಷ್ಯನನ್ನು ಕಲುಷಿತಗೊಳಿಸುವುದಿಲ್ಲ; ಬಾಯೊಳಗಿನಿಂದ ಹೊರಕ್ಕೆ ಬರುವಂಥದ್ದೇ ಮನುಷ್ಯನನ್ನು ಕಲುಷಿತಗೊಳಿಸುತ್ತದೆ," ಎಂದು ಹೇಳಿದರು. ಆಗ ಶಿಷ್ಯರು ಹತ್ತಿರಕ್ಕೆ ಬಂದು, "ನಿಮ್ಮ ಮಾತನ್ನು ಕೇಳಿ ಫರಿಸಾಯರು ಬಹಳ ಬೇಸರಗೊಂಡಿದ್ದಾರೆಂದು ನಿಮಗೆ ತಿಳಿಯಿತೇ?" ಎಂದರು. ಅದಕ್ಕೆ ಯೇಸು, "ನನ್ನ ಪರಮಪಿತನು ನೆಡದ ಗಿಡಗಳನ್ನೆಲ್ಲಾ ಬೇರುಸಹಿತ ಕಿತ್ತುಹಾಕಲಾಗುವುದು. ಅವರನ್ನು ಅವರಷ್ಟಕ್ಕೇ ಬಿಡಿ; ಅವರೊ ಕುರುಡರು, ಮತ್ತೊಬ್ಬರಿಗೆ ದಾರಿ ತೋರಿಸಲು ಹೋಗುತ್ತಾರೆ. ಕುರುಡನು ಕುರುಡನಿಗೆ ದಾರಿ ತೋರಿಸಿದರೆ ಇಬ್ಬರೂ ಹಳ್ಳದಲ್ಲಿ ಬೀಳುತ್ತಾರಷ್ಟೆ," ಎಂದರು.

03.08.2026 - ನಮ್ಮ ಬಳಿ ಐದೇ ಐದು ರೊಟ್ಟಿ ಮತ್ತು ಎರಡು ಮೀನುಗಳು ಮಾತ್ರ ಇವೆ,

ಮೊದಲನೆಯ ವಾಚನ : ಯೆರೆಮೀಯನ ಗ್ರಂಥದಿಂದ ಇಂದಿನ ವಾಚನ 28: 1-17

ಜುದೇಯದ  ಅರಸ  ಚಿದ್ಕೀಯನ  ಆಳ್ವಿಕೆಯಲ್ಲಿ  ನಾಲ್ಕನೆಯ  ವರ್ಷದ  ಐದನೆಯ  ತಿಂಗಳಲ್ಲಿ,  ಪ್ರವಾದಿಯಾದ  ಅಜ್ಜೂರನ  ಮಗನು  ಹಾಗು  ಗಿಬ್ಯೋನ್  ಊರಿನವನು  ಆದ  ಹನನ್ಯನು  ಸರ್ವೇಶ್ವರನ  ಆಲಯದೊಳಗೆ  ಬಂದು  ಯಾಜಕರ  ಮತ್ತು  ಸಕಲ  ಜನರ  ಮುಂದೆ  ನಿಂತು  ನನಗೆ  ಹೀಗೆ  ಹೇಳಿದ: "ಇಸ್ರಯೇಲರ  ದೇವರೂ  ಸರ್ವಶಕ್ತರೂ  ಆದ  ಸರ್ವೇಶ್ವರನ  ನುಡಿ  ಇದು:  'ಬಾಬಿಲೋನಿಯದ  ಅರಸನು  ಹೇರಿರುವ  ನೊಗವನ್ನು  ಮುರಿದುಬಿಟ್ಟಿದ್ದೇನೆ.  ಬಾಬಿಲೋನಿಯದ  ಅರಸನಾದ  ನೆಬೂಕದ್ನೆಚ್ಚರನು  ಈ  ಸ್ಥಳದಿಂದ  ಬಾಬಿಲೋನಿಗೆ  ಕೊಂಡೊಯ್ದ  ಸರ್ವೇಶ್ವರನ  ಆಲಯದ  ಸಕಲ  ಉಪಕರಣಗಳನ್ನು  ಎರಡು  ವರ್ಷಗಳೊಳಗಾಗಿ  ನಾನು  ಪುನಃ  ಈ  ಸ್ಥಳಕ್ಕೆ  ಸೇರಿಸುವೆನು.  ಯೆಹೋಯಾಕೀಮನ  ಮಗನೂ  ಜುದೇಯದ  ಅರಸನೂ  ಆದ  ಯೆಕೊನ್ಯನನ್ನು  ಮತ್ತು  ಬಾಬಿಲೋನಿಗೆ  ಸೆರೆಹೋದ  ಎಲ್ಲ  ಯೆಹೂದ್ಯರನ್ನು  ಈ  ಸ್ಥಳಕ್ಕೆ  ಮರಳಿ  ಬರಮಾಡುವೆನು.  ಇದು  ಸರ್ವೇಶ್ವರನ  ನುಡಿ."  ಆಗ  ಪ್ರವಾದಿ  ಯೆರೆಮೀಯನು  ಸರ್ವೇಶ್ವರನ  ಆಲಯದೊಳಗೆ  ನಿಂತಿದ್ದ  ಯಾಜಕರ  ಮತ್ತು  ಸಕಲ  ಜನರ  ಎದುರಿನಲ್ಲೇ  ಪ್ರವಾದಿ  ಹನನ್ಯನಿಗೆ:  "ಆಮೆನ್!  ಸರ್ವೇಶ್ವರ  ಹಾಗೆಯೇ  ಮಾಡಲಿ!  ಸರ್ವೇಶ್ವರ  ತಮ್ಮ  ಆಲಯದ  ಉಪಕರಣಗಳನ್ನೂ  ಸೆರೆಹೋದವರೆಲ್ಲರನ್ನೂ  ಬಾಬಿಲೋನಿನಿಂದ  ಈ  ಸ್ಥಳಕ್ಕೆ  ಪುನಃ  ಬರಮಾಡಲಿ.  ನೀನು  ನುಡಿದ  ಮಾತುಗಳನ್ನು    ನೆರವೇರಿಸಲಿ!  ಆದರೆ  ನಾನು,  ನಿನ್ನ  ಮತ್ತು  ಸಕಲ  ಜನರ  ಕಿವಿಗೆ  ಬೀಳುವಂತೆ  ನುಡಿಯುವ  ಈ  ಮಾತನ್ನು  ಗಮನಿಸು:  ನನಗೂ  ನಿನಗೂ  ಹಿಂದೆ,  ಪುರಾತನ  ಕಾಲದಿಂದಿದ್ದ  ಪ್ರವಾದಿಗಳು  ಅನೇಕ  ದೇಶಗಳಿಗೂ  ದೊಡ್ಡ  ದೊಡ್ಡ  ರಾಜ್ಯಗಳಿಗೂ  ಯುದ್ದ,  ಆಪತ್ತು - ವಿಪತ್ತು,  ಕಾಯಿಲೆ -ಕಷ್ಟ,  ಇಂಥವುಗಳನ್ನು  ಸಾರುತ್ತಿದ್ದರು.  ಹಿತಸಮಾಚಾರವನ್ನು  ಸಾರುವ  ಪ್ರವಾದಿಯೇ  ಸರ್ವೇಶ್ವರನಿಂದ  ನಿಜವಾಗಿ  ಕಲಿಸಲ್ಪಟ್ಟವನೆಂದು  ಅವನ  ಮಾತು  ಕೈಗೂಡಿದ  ಮೇಲೆ  ತಿಳಿಯತಕ್ಕದ್ದು," ಎಂದು  ಹೇಳಿದನು.  ಆಗ  ಪ್ರವಾದಿ  ಹನನ್ಯನು  ಪ್ರವಾದಿ ಯೆರೆಮೀಯನ  ಹೆಗಲಿನಿಂದ  ನೊಗವನ್ನು  ತೆಗೆದು  ಮುರಿದುಹಾಕಿದನು.  ನೆರೆದಿದ್ದ  ಜನರೆಲ್ಲರ  ಮುಂದೆ,  "ಸರ್ವೇಶ್ವರನೇ  ಹೇಳಿದ್ದಾರೆ - ಇದೇ  ಪ್ರಕಾರ,  ಬಾಬಿಲೋನಿನ  ಅರಸ  ನೆಬೂಕದ್ನೆಚ್ಚರನು  ಹೊರಿಸಿರುವ  ನೊಗವನ್ನು  ಇನ್ನೆರಡು  ವರ್ಷದೊಳಗೆ  ಸಮಸ್ತ  ರಾಷ್ಟ್ರಗಳ  ಹೆಗಲಿನಿಂದ  ತೆಗೆದು  ಮುರಿದುಹಾಕಲಾಗುವುದು,"  ಎಂದು  ಹೇಳಿದನು.  ಇದನ್ನು  ಕೇಳಿದ  ಪ್ರವಾದಿ  ಯೆರೆಮೀಯನು  ಅಲ್ಲಿಂದ   ಹೊರಟುಹೋದನು.  ಹೀಗೆ  ಪ್ರವಾದಿ  ಹನನ್ಯನು  ಪ್ರವಾದಿ ಯೆರೆಮೀಯನ  ಹೆಗಲಿನಿಂದ  ನೊಗವನ್ನು  ತೆಗೆದು,  ಮುರಿದುಹಾಕಿದ  ಮೇಲೆ  ಸರ್ವೇಶ್ವರ  ಯೆರೆಮೀಯನಿಗೆ  ಹೀಗೆಂದರು:  "ನೀನು  ಹೋಗಿ  ಹನನ್ಯನಿಗೆ:  'ಸರ್ವೇಶ್ವರ  ಇಂತೆನ್ನುತ್ತಾರೆ - ನೀನು  ಮರದ  ನೊಗಗಳನ್ನು  ಮುರಿದು  ಬಿಟ್ಟಿರುವೆ.  ಅವುಗಳಿಗೆ  ಬದಲಾಗಿ  ಕಬ್ಬಿಣದ  ನೊಗಗಳನ್ನು  ಮಾಡು.  ಏಕೆಂದರೆ  ಇಸ್ರಯೇಲರ  ದೇವರೂ  ಸೇನಾಧೀಶ್ವರರೂ  ಆದ  ಸರ್ವೇಶ್ವರನ  ಮಾತಿವು:  ಈ  ಎಲ್ಲ  ರಾಷ್ಟ್ರಗಳು  ಬಾಬಿಲೋನಿಯದ  ಅರಸ  ನೆಬೂಕದ್ನೆಚ್ಚರನಿಗೆ  ಸೇವೆಮಾಡಲೆಂದು  ನಾನು  ಅವುಗಳ  ಹೆಗಲಿಗೆ  ಕಬ್ಬಿಣದ ನೊಗವನ್ನು  ಹೇರಿದ್ದೇನೆ.  ಅವು  ಅವನಿಗೆ  ಸೇವೆ  ಸಲ್ಲಿಸೇ  ತೀರಬೇಕು;  ಕಾಡುಮೃಗಗಳು  ಕೂಡ  ಸೇವೆಸಲ್ಲಿಸುವಂತೆ  ಅವನಿಗೆ  ಅವುಗಳನ್ನು  ಒಪ್ಪಿಸಿದ್ದೇನೆ,  ಎಂದು  ಹೇಳು."  ಆಗ  ಪ್ರವಾದಿ  ಯೆರೆಮೀಯನು  ಪ್ರವಾದಿ  ಹನನ್ಯನಿಗೆ,  "ಹನನ್ಯನೆ  ಕೇಳು,  ಸರ್ವೇಶ್ವರ  ನಿನ್ನನ್ನು  ಕಳಿಸಲಿಲ್ಲ.  ಆದರೂ  ಈ  ಜನರು  ಸುಳ್ಳನ್ನು  ನಂಬುವಂತೆ  ಮಾಡುತ್ತಿರುವೆ.  ಆದಕಾರಣ  ಸರ್ವೇಶ್ವರ  ಇಂತೆನ್ನುತ್ತಾರೆ:  ಇಗೋ,  ನಾನು  ನಿನ್ನನ್ನು  ಈ  ಜಗತ್ತಿನಿಂದ  ತೊಲಗಿಸುವೆನು.  ನೀನು  ಸರ್ವೇಶ್ವರನಾದ  ನನಗೆ  ವಿರುದ್ದವಾಗಿ  ದ್ರೋಹದ  ಮಾತುಗಳನ್ನು  ಆಡಿದ್ದರಿಂದ  ಇದೇ  ವರ್ಷ  ಸಾಯುವೆ," ಎಂದು ಹೇಳಿದನು.  ಅಂತೆಯೇ  ಹನನ್ಯನು  ಅದೇ  ವರ್ಷದ  ಏಳನೆಯ  ತಿಂಗಳಲ್ಲಿ  ಸತ್ತುಹೋದನು.

ಪ್ರಭುವಿನ  ವಾಕ್ಯ

ಕೀರ್ತನೆ: 119: 29, 43, 79-80, 95, 102. v.68

ಶ್ಲೋಕ:  ಪ್ರಭೂ,  ಬೋಧಿಸೆನಗೆ  ನಿನ್ನ  ನಿಬಂಧನೆಗಳನ್ನು.

1.  ಮಿಥ್ಯ ಮಾರ್ಗವನು ನನಗೆ ದೂರಮಾಡಯ್ಯಾ|

ಧರ್ಮಶಾಸ್ತ್ರವನು ಎನಗೆ ಅನುಗ್ರಹಿಸಯ್ಯಾ||

ತೆಗೆಯಬೇಡ ನನ್ನ ಬಾಯಿಂದ ಸತ್ಯವನು|

ನಂಬಿಕೊಂಡಿರುವೆ  ನಿನ್ನ ನ್ಯಾಯವಿಧಿಯನು||

ಶ್ಲೋಕ

2.  ನನ್ನತ್ತ ಬರಲಿ ನಿನ್ನಲಿ ಭಯಭಕ್ತಿಯುಳ್ಳವರು|

ನಿನ್ನ ಕಟ್ಟಳೆಗಳನು ಆಗ ಕಲಿತುಕೊಳ್ಳುವರು||

ನಿನ್ನ ನಿಬಂಧನೆಗಳಲಿ ಸ್ಥಿರವಿದೆ ಎನ್ನ ಮನ|

ನನಗೆ ಒದಗದು ಆಗ ಆಶಾಭಂಗ, ಅವಮಾನ||

ಶ್ಲೋಕ

3.  ಹೊಂಚುಹಾಕುತಿಹರು ದುರುಳರು ಸಂಹರಿಸಲೆನ್ನನು|

ನಾನೋ ನಿನ್ನ ಕಟ್ಟಳೆಗಳನು ಲಕ್ಷಿಸುತ್ತಿರುವೆನು||

ತಪ್ಪಿಸಿಕೊಳ್ಳಲಿಲ್ಲ ನಾ ನಿನ್ನ ವಿಧಿಗಳಿಂದ|

ನೀನೇ ನನಗದರ ಬೋಧನೆ ಮಾಡಿದ್ದರಿಂದ||

ಶ್ಲೋಕ

ಘೋಷಣೆ

(ಕೀರ್ತನೆ 19: 8)

ಪ್ರಭುವಿನ  ನಿಯಮ  ನೀತಿಬದ್ಧ; ಮನಸ್ಸಿಗದು  ಗ್ರಹಿಕೆ| ಪ್ರಭುವಿನ  ಕಟ್ಟಳೆ  ಪರಿಶುದ್ಧ; ಕಣ್ಣಿಗದು  ದೀವಿಗೆ ||

ಶುಭಸಂದೇಶ :ಮತ್ತಾಯನು ಬರೆದ ಪವಿತ್ರ ಶುಭಸಂದೇಶದಿಂದ ವಾಚನ 14: 13-21

ಆ  ಕಾಲದಲ್ಲಿ      ಯೇಸು  ಆ  ಸ್ಥಳವನ್ನು  ಬಿಟ್ಟು,  ದೋಣಿಹತ್ತಿ  ನಿರ್ಜನ  ಪ್ರದೇಶಕ್ಕೆ  ಒಬ್ಬಂಟಿಗರಾಗಿ  ಹೊರಟರು.  ಇದನ್ನು  ತಿಳಿದುಕೊಂಡ  ಜನರು  ಊರೂರುಗಳಿಂದ  ಹೊರಟು  ಗುಂಪು  ಗುಂಪಾಗಿ  ಅವರ  ಹಿಂದೆಯೇ  ಕಾಲ್ದಾರಿಯಲ್ಲಿ  ನಡೆದುಹೋದರು.  ಯೇಸು  ದೋಣಿಯಿಂದ  ಇಳಿದಾಗ,  ದೊಡ್ಡ  ಜನಸಮೂಹ  ಆಗಲೇ  ಅಲ್ಲಿ  ಸೇರಿತ್ತು.  ಆ  ಸಮೂಹವನ್ನು  ಕಂಡು  ಅವರ  ಮನ  ಕರಗಿತು;  ಅವರಲ್ಲಿ  ಅಸ್ವಸ್ಥರಾಗಿದ್ದವರನ್ನು  ಗುಣಪಡಿಸಿದರು.  ಸಂಜೆಯಾದಾಗ,  ಶಿಷ್ಯರು  ಯೇಸುವಿನ  ಬಳಿಗೆ  ಬಂದು,  "ಇದು  ನಿರ್ಜನ  ಪ್ರದೇಶ.  ಈಗಾಗಲೇ  ಹೊತ್ತು  ಮೀರಿಹೋಗಿದೆ.  ಜನಸಮೂಹವನ್ನು  ಕಳುಹಿಸಿಬಿಡಿ,  ಹಳ್ಳಿಪಳ್ಳಿಗಳಿಗೆ  ಹೋಗಿ  ಅವರಿಗೆ  ಬೇಕಾದ  ತಿಂಡಿತಿನಿಸುಗಳನ್ನು  ಕೊಂಡುಕೊಳ್ಳಲಿ."  ಎಂದರು.  ಅದಕ್ಕೆ  ಯೇಸು,  "ಅವರು  ಹೋಗಬೇಕಾಗಿಲ್ಲ,  ನೀವೇ  ಅವರಿಗೆ  ಊಟಕ್ಕೆ  ಏನಾದರೂ ಕೊಡಿ," ಎಂದರು.  ಶಿಷ್ಯರು  ಪ್ರತ್ಯುತ್ತರವಾಗಿ,  "ನಮ್ಮ  ಬಳಿ  ಐದೇ  ಐದು  ರೊಟ್ಟಿ  ಮತ್ತು  ಎರಡು  ಮೀನುಗಳು. ಮಾತ್ರ  ಇವೆ," ಎಂದರು.  ಯೇಸು, "ಅವನ್ನು  ಇಲ್ಲಿಗೆ  ತನ್ನಿ,"  ಎಂದು  ಹೇಳಿ,  ಜನರೆಲ್ಲರೂ  ಹುಲ್ಲಿನ  ಮೇಲೆ  ಕುಳಿತುಕೊಳ್ಳುವಂತೆ  ಅಪ್ಪಣೆಮಾಡಿದರು.  ಬಳಿಕ  ಆ  ಐದು  ರೊಟ್ಟಿಗಳನ್ನೂ  ಎರಡು  ಮೀನುಗಳನ್ನೂ  ತೆಗೆದುಕೊಂಡು,  ಸ್ವರ್ಗದತ್ತ  ಕಣ್ಣೆತ್ತಿ  ನೋಡಿ,  ದೇವರಿಗೆ  ಸ್ತೋತ್ರ  ಸಲ್ಲಿಸಿದರು.  ತರುವಾಯ  ರೊಟ್ಟಿಗಳನ್ನು  ಮುರಿದು  ಶಿಷ್ಯರಿಗೆ  ಕೊಟ್ಟರು.  ಶಿಷ್ಯರು  ಜನರಿಗೆ  ಹಂಚಿದರು.  ಎಲ್ಲರೂ  ಹೊಟ್ಟೆ  ತುಂಬ  ತಿಂದು  ತೃಪ್ತರಾದರು.  ಉಳಿದಿದ್ದ  ತುಂಡುಗಳನ್ನು  ಒಟ್ಟುಗೂಡಿಸಿದಾಗ  ಅವು  ಹನ್ನೆರಡು  ಬುಟ್ಟಿಗಳ  ತುಂಬಾ  ಆದವು.  ಊಟಮಾಡಿದವರಲ್ಲಿ  ಹೆಂಗಸರು,  ಮಕ್ಕಳನ್ನು  ಬಿಟ್ಟರೆ,  ಗಂಡಸರೇ  ಸುಮಾರು  ಐದು  ಸಾವಿರ  ಇದ್ದರು.